Askur Laufeyjarson kom að hundunum sínum dauðum fyrr í júlí og mun lögreglan rannsaka málið.
Þann 8. júlí fór Askur Laufeyjarson af heimili sínu í fimm tíma og kom að tíu hundunum sínum dauðum þegar hann kom til baka.
„Þetta er gjörsamlega búið að snúa lífinu á hvolf. Allt sem ég stefndi að í lífinu var tengt hundunum. Mér finnst ég ekki vera öruggur heima hjá mér og mun örugglega aldrei finna fyrir öryggi þar aftur nema hægt verði að útiloka að svona lagað geti gerst aftur,“ sagði Askur í viðtali við Vísi.
Askur er 23 ára hundaþjálfari sem býr á bænum Engihlíð í Norðurdal í Breiðdal. Askur veit ekki hvað gerðist og leitaði til dýralækna eftir skýringum. Í framhaldi þess fór málið inn á borð MAST.
Í tilkynningu frá MAST segir að málið verði nú rannsakað af lögreglu.
„Matvælastofnun hefur enn fremur óskað eftir rannsókn lögreglunnar á Austurlandi á máli þar sem tíu hundar fundust dauðir í útigerði eftir að umráðamaður þeirra hafði verið fjarverandi í nokkra klukkutíma.“