Landlæknir rannsakar nú dánarorsök ungs barns sem lést á Norðurlandi fyrir rúmri viku. Barnið var smitað af Covid-19.
„Þegar það koma upp óvænt dauðsföll líkt og þetta ber okkur að tilkynna það til landlæknis sem er nú með málið á sínu borði,“ segir Örn Ragnarsson, framkvæmdastjóri lækninga hjá Heilbrigðisstofnun Norðurlands, í samtali við fréttastofu RÚV.
Kjartan Hreinn Njálsson, aðstoðarmaður Ölmu D. Möller landlæknis, staðfestir í skriflegu svari til fréttastofu RÚV að embættinu hafi borist tilkynning um óvænt atvik á heilbrigðisstofnun sem varðar andlát barns.
„Við slíkar aðstæður fer fram réttarkrufning til að leiða í ljós dánarorsök, réttarkrufning er ætíð á forræði lögreglu. Rannsókn embættisins er á frumstigi og er ekki hægt að gefa frekari upplýsingar,“ segir í svari Kjartans.