Reynir Sveinsson, fréttaritari Morgunblaðsins í Sandgerði, lést 21. janúar síðastliðinn á Heilbrigðisstofnun Suðurnesja, 75 ára að aldri.
Mbl.is segir frá andlátinu en þar kemur fram að Reynir hafi fæðst 2. júní 1948 í Sandgerði en þar bjó hann alla tíð. Foreldrar hans voru Sveinn Aðalsteinn Gíslason rafveitustjóri og Guðbjörg Hulda Guðmundsdóttir. Reynir átti sjö systkini.
Faðir Reynis kenndi honum rafvirkjun og rak Reynir verkstæðið Rafverk ehf. í rúm 30 ár en í kringum aldamótin hóf hann störf hjá Sandgerðisbæ sem forstöðumaður Fræðaseturs í Sandgerði, sem nú heitir Þekkingarsetur Suðurnesja. Þá starfaði Reynir lengi að félagsmálum á Suðurnesjum. Í 20 ár sat hann fyrir Sjálfstæðisflokkinn í bæjarstjórn Sandgerðis og var í hafnarráði sveitarfélagsins í 16 ár.
Aukreitis var Reynir afar virkur í björgunarsveitinni Sigurvon og var í Slökkviliði Sandgerðis í 40 ár og slökkviliðsstjóri í níu ár.
Fyrir utan allt sem upp er talið, var Reynir einnig fréttaritari Morgunblaðsins í Sandgerði í 30 ár og var duglegur að taka ljósmyndir og skrásetja þannig sögu og mannlíf staðarins.
Eiginkona Reynis var Guðmundína Þorbjörg Kristjánsdóttir en þau skildu. Saman áttu þau þrjú börn og 11 barnabörn.
Mannlíf sendir vinum og ættingjum Reynis innilega samúðarkveðjur.