Ríkisútvarpið mun minnka umsvif sín á auglýsingamarkaði. Þá mun starfsemin aukast á landsbyggðinni.
Fram kemur í frétt Vísis að til standi að minnka umsvif Ríkisútvarpsins á auglýsingamarkaði en Lilja Alfreðsdóttir, menningar og viðskiptamálaráðherra og Stefán Eiríksson útvarpsstjóri, sendu frá sér sameiginlega yfirlýsingu í dag. Þar kemur fram að Ríkið muni koma til móts við RÚV ef það verður fyrir tekjutapi í kjölfar breytinganna.
Yfirlýsing þessi er viðauki við nýjan þjónustusamning Lilju við Ríkisútvarpið en á gildistíma samningsins á að minnka umsvif RÚV á samkeppnismarkaði. Slíkt á að nást með frekari takmörkunum á birtingu viðskiptaboða, eða með því að breyta umfangi og eðli auglýsingasölu. Einnig verður unnið að útfærslu stafrænna lausna sem geri það mögulegt fyrir viðskiptavini að panta auglýsingar á netinu.
Aukreitis kemur fram í yfirlýsingunni að komið verði til móts við hugsanlegt tekjutap RÚV af dvínandi umsvifum á samkeppnismarkaði, með það að markmiði að Ríkisútvarpið geri sinnt sínu lögmundna hlutvarki áfram, og uppfyllt ákvæði þjónustusamnings.
Þá kemur einnig fram í þjónustusamningnum að starfsemi RÚV muni aukast um tíu prósent á landsbyggðinni á samningstímanum. Einnig skal hlutfall dagskrárefnis sem keypt er af sjálfstæðum framleiðendum vera að meðaltali 35 prósent af íslensku efni í sjónvarpi en það verður mælt í klukkustundum og miðað við frumsýnt efni á kjörtíma í línulegri dagskrá.