Slökkviliðið á höfuðborgarsvæðinu hefur lagt fram kæru gegn eiganda húsnæðis við Miklubraut vegna ófullnægjandi eldvarna. Eigandinn leigði kjallara húsnæðisins út en þar eru engir gluggar. Kjallarinn er skráður sem geymsla undir verslunarrými. Fjallað var um málið í fréttaþættinum Kveik í vor.
Fjölskylda frá Venesúela, hjón með tvö börn, bjuggu í kjallaranum í tæpt ár. Áður fyrr var þar kolageymsla. Í skýrslu slökkviliðsins segir að engin loftun, mikill saggi, mjög heitt og þungt loft vera í kjallaranum. Lofthæð er um tveir metrar og eina flóttaleiðin er í gegnum löng geymslugöng. Í þætti Kveiks kemur fram að nokkuð sé um svipuð mál þar sem eigendur húsnæða nota hvern fermeter undir leigu en oft eru íbúar þar í slæmum aðstæðum og jafnvel taldir vera í hættu. Flestir íbúanna eru útlendingar sem bráðvantar ódýrt húsnæði.
Eigandi húsnæðisins við Miklubraut er kærður fyrir brot á brunarvarnalögum.