Skilaboð þess efnis að Grillinu á Radisson BLU Hótel Sögu hafi verið lokað um óákveðin tíma taka á móti fólki á vef Grillsins. Þá hefur Facebook-síðu Grillsins verið lokað og sömuleiðis Instagram-síðu staðarins.
Orðrómur um að Grillinu hafi verið lokað fyrir fullt og allt komst á kreik eftir að samfélagsmiðlum staðarins var lokað en hótelstjóri Hótels Sögu sagði að sá orðrómur eigi ekki við rök að styðjast.
Ingibjörg Ólafsdóttir er hótelstjóri á Hótel Sögu. Í fyrirspurn Mannlífs um hvort búið sé að loka Grillinu fyrir fullt og allt sagði Ingibjörg Grillið vera of dýrmætt vörumerki til að loka staðnum endanlega.
Hún sagði óvissu ríkja um framhaldið vegna útbreiðslu kórónaveirunnar en að ljóst sé að staðurinn verði lokaður eitthvað áfram og að verið sé að skoða hvenær og með hvaða sniði Grillið opni aftur.