Í dag verður boðið upp á sanna jólastemningu í Skúrnum (The Shed) við Suðurgötu 9 í Hafnarfirði þar sem stærsta jólatré Íslands er jafnframt staðsett.
Hjónin og hönnuðirnir Anthony Bacigalupo og Ýr Káradóttir eiga og reka Skúrinn ásamt því að vera stofnendur og eigendur Reykjavik Trading Co. sem margir kannast við.
Í Skúrnum selja þau ýmsar sérvaldar vörur sem ekki hafa fengist á Íslandi áður ásamt eigin hönnun undir merkjum Reykjavik Trading Co. Undanfarnar helgar hafa hjónin boðið upp á jólasmakk fyrir gesti og gangandi þar sem alls kyns kræsingar hafa verið á boðstólum.
Þennan laugardag verður opið frá kl. 12-16 og boðið verður upp á eggjapúns frá Ólafi Ágústssyni matreiðslumanni á KEX í Portland ásamt heimagerðu graskersbrauði sem bakað er eftir uppskrift frá langömmu Anthonys í Kaliforníu.
Það er því tilvalið að leggja leið sína í Hafnarfjörð, klára jólagjafakaupin og upplifa sanna jólastemningu en Skúrinn er í göngufæri frá Jólaþorpinu.
