Líf Harry Bretaprins breyttist að eilífu föstudaginn 1. júlí 2016, þegar bæði falleg og hæfileikarík bandarísk leikkona sendi honum einkaskilaboð á Instagram. Í nýrri bók Harrys segir hann frá því hvernig hann og Meghan byrjuðu að tala saman í gegnum samfélagsmiðilinn Instagram.
Harry segist hafa verið að skoða Instagram þegar hann rakst á mynd af vinkonu sinni með konu sér við hlið en konan var Meghan Markle. Í kjölfarið sendi hann vinkonu sinni skilaboð og spurði hana hver konan við hlið hennar væri. Vinkonan svaraði því og bætti við að hann væri sjöundi maðurinn sem spurði hver hún væri. Harry lét það ekki stoppa sig. Daginn eftir birtust skilaboð á síma Harrys en þar stóð: „Halló! Fallegar myndir.” Skilaboðin voru frá engri annarri en Meghan sem hafði skömmu áður samþykkt vinabeiðni hans. Þannig hófust samskipti hjónanna en ekki leið á löngu þar til þau hittust í fyrsta sinn.