Plötusnúðurinn Margeir Ingólfsson, betur þekktur sem DJ Margeir, birti mynd á Facebook um helgina sem var tekin þegar lögregla þurfti að hafa afskipti af honum vegna tónlistarveislu sem hann hélt á Arnarhóli. Þar lék hann fyrir dansi ásamt Natalie Gunnarsdóttur.
„Þetta var algjörlega sjálfsprottið og spontant, allir velkomnir, ekki var selt inn og ekki voru seldar veitingar. Ég einfaldlega kveikti á nokkrum kröftugum Soundboks bluetooth hátölurum og lét vita með örstuttum fyrirvara í Instagram story,“ er haft eftir Margeiri á vef Nútímans.
Hann segist hafa gert sitt besta til að valda ekki ónæði og að fjöldi gesta hverju sinni hafi verið innan fjöldatakmarka sem eru í gildi vegna kórónuveirufaraldursins.
„Það var fátt um svör þegar ég spurði lögregluna hvort hún vildi frekar að fólk færi af hólnum og inn í heimahús með þeim truflunum sem því fylgja,“ er haft eftir Margeiri sem segir sig vera sekan um að reyna að hafa gaman.