Selfyssingurinn Guðmundur Þórarinsson, eða Gummi Tóta eins og hann er gjarnan kallaður, er atvinnumaður í fótbolta og spilar með sænska liðinu IFK Nörrköping. Auk þess að spila fótbolta hefur hann verið að semja tónlist um nokkurt skeið og söng til dæmis hin vinsæla sumarsmell Sumargleðin með bróður sínum Ingólfi, betur þekktum sem Ingó Veðurguð, á Þjóðhátíð. Nú er komin plata frá kappanum sem nefnist Svart og sykurlaust.
„Platan innheldur góða blöndu af hressum lögum og ballöðum og rólegri tónlist og síðan heiðarlega texta, sem hverfast um alls konar hluti sem ég hef verið að ganga í gegnum; ást, ástarsorg, erfiða daga og góða,“ segir Gummi þegar blaðamaður forvitnast um plötuna.
Er eitthvert lag á plötunni sem þér þykir vænna um en annað? „Ég á nú erfitt með að gera upp á milli þeirra, þau eru þarna nokkur sem mér þykir mjög vænt um. En ég ætla samt að nefna lögin Dimmar götur og Kveðjustund,“ segir hann en vill ekki tilgreina ástæðuna. „Nei, ég vill helst að lögin og textarnir lifi sínu lífi og að þeir sem hlusti geti tengt við lögin á sinn hátt.“
„Já, við erum ekki hættir að gera lög saman. Og aldrei að vita hvenær við hendum í næsta samstarf.“
En hvernig gengur eiginlega að tvinna saman tónlistarferil og atvinnumennsku í fótbolta?
„Ég hef mikinn frítíma til að semja tónlist þegar ég er erlendis. Síðan nýti ég tímann þegar ég er heima á Íslandi til að taka upp allan söng,“ svarar hann og bætir við að hann njóti líka góðs af því að vinna með atvinnumönnum í tónlist. Þannig hafi Ásgeir Orri Ásgeirsson pródúserað alla plötuna og Sæþór Kristjánsson séð um hljóðblöndun.
Mynd / Marcus Falk Olander
„Ég geri sjaldnast miklar athugasemdir við það sem Ásgeir er gera því vanalega fer hann með lögin á næsta „level“. Vinnan hans er alveg á heimsmælikvarða og hann á helling í lögunum. Sömu sögu má segja um Sæþór. Líkt og Ásgeir er hann fagmaður fram í fingurgóma,“ lýsir hann og segir ferlið við gerð plötunnar hafa gengið vel, þótt vitanlega hafi það verið mikil vinna.
Spurður í lokin út í samstarfið við bróður hans Ingó, svarar Gummi að það hafi verið ótrúlega skemmtilegt að syngja með honum lagið Sumargleðin eftir Doctor Victor og sjá það fara á flug í kringum Þjóðhátíð. „Það var ólýsanlega gaman og erfitt að útskýra með orðum hvað það gaf manni mikið.“
Ætlið þið bræðurnir að vinna eitthvað frekar saman? „Já, við erum ekki hættir að gera lög saman,“ svarar hann hress. „Og aldrei að vita hvenær við hendum í næsta samstarf.“
Texti / Sigrún Guðjohnsen