Erlendir aðdáendur Duran Duran munu flykkjast til landsins

Búast má við töluverðum fjölda Duran Duran-aðdáenda hvaðanæva úr heiminum á tónleikum sveitarinnar í Laugardalshöll þann 25. júní ef marka má miðasölu á tónleikana.

Hljómsveitin hefur ekki áform um að halda aðra tónleika í Evrópu á árinu 2019, fyrir utan þátttöku Duran Duran á tónlistarhátíð í Óðinsvéum í Danmörku í lok júní, en nokkrir tónleikar eru fyrirhugaðir í Bandaríkjunum í september, þar á meðal á tónlistarhátíð í San Diego í Kaliforníu.

Því eru tónleikarnir á Íslandi einu tónleikarnir í fullri lengd í Evrópu það sem eftir lifir árs og eina tækifæri aðdáenda að sjá goðin sín á sviði.

„Það kemur okkur skemmtilega á óvart að sjá hversu margir erlendir aðdáendur ætla að koma til Íslands til að sjá Duran Duran. Samkvæmt þeim upplýsingum sem við sjáum í miðasölukerfinu þá hefur verið seldur töluverður fjöldi miða til kaupenda sem eru ekki búsettir á Íslandi og þá flestir frá Englandi og Hollandi,“ segir Björgvin Þór Rúnarsson hjá Mono viðburðir sem standa að tónleikunum.

AUGLÝSING


„Félagsmönnum í aðdáendaklúbbi Duran Duran var send tilkynning um tónleikana og boðið að kaupa miða í forsölunni. Þeir létu ekki á sér standa og greinilegt að Duran Duran eiga stóran hóp dyggra aðdáenda sem nýta tækifærið og skella sér til Íslands til að sjá bandið.“

Duran Duran hafa þó verið iðnir síðustu mánuði með tónleika í Evrópu, Bandaríkjunum, Suður-Ameríku, Miðausturlöndum og Asíu við frábærar viðtökur og dóma tónlistargagnrýnenda. Um þessar mundir er hljómsveitin hins vegar í tónleikahléi vegna upptöku á nýrri plötu sem kemur út áður en langt um líður og verður henni fylgt eftir með tónleikaferðalagi um allan heim.

Það er Grammy verðlaunahafinn Mark Ronson sem vinnur plötuna með hljómsveitinni en þetta er í þriðja sinn sem Ronson og Duran Duran leiða saman hesta sína.

Tónleikarnir í Reykjavík fara fram í nýju Laugardalshöllinni sem rúmar 10.000 gesti en alls sóttu um það bil 12.000 manns tónleika sveitarinnar árið 2005.

Miðasala á tónleikana hefur farið vel af stað og búið er að selja nokkur þúsund miða á tónleikana í sumar. Hægt er að nálgast miða á tónleikana á Tix.is

Ekki missa af þessum

Annað áhugavert efni