Samkvæmt nýju líkani Íslenskrar erfðagreiningar virðist hjarðónæmi nást fyrr ef ungt fólk er bólusett á undan því eldra. Það er þveröfugt við þá stefnu sóttvarnaryfirvalda sem verið hefur fram til þessa.
Nýja líkanið var kynnt á fundi í dag. Þar komu fram niðurstöður vísindamanna á því hvaða áhrif það hefði haft ef stór hluti þjóðarinnar hefði verið kominn með fyrri bólusetningarsprautu í haust þegar þriðja bylgjan braust út.
Líkanið sýnir að það hefði strax haft áhrif og hægt á útbreiðslu faraldursins með því að rjúfa smitkeðjur, en bólusettir smita síður aðra. Engu að síður hefði brotist út stór faraldur með allt að 700 smitum.
Líkanið sýndi einnig að hjarðónæmi mætti ná fyrr með því að byrja bólusetja ungt fólk, en ekki það elsta líkt og nú er gert. Þá væri nóg að bólusetja 55% fullorðinna til að halda smitum innan við 100.
Að bólusetja fólk handahófskennt myndi sömuleiðis skila skjótari árangri.
Líkanið miðar við þær takmarkanir sem giltu í þriðju bylgju, sem eru svipaðar þeim er nú gilda.
Stefna stjórnvöld á að aflétta takmörkunum í lok júní þegar 75% hafa fengið fyrri sprautuna. Þá væru enn stórir hópar ungs fólks ekki búið að fá bólusetningu. Samkvæmt Páli Melsted, prófessor í tölvunarfræði, væri þá hætt við útbreiddum faraldri meðal þess hóps.
Í lok maí miðar afléttingaráætlun stjórnvalda við það að allt að 1000 manns fái að koma saman. Þá verða um 50% fullorðinna komið með fyrri skammt. Páll segir í samtalið við fréttastofu RÚV það vera misráðið: „Það þyrfti í raun og veru næstum því að klára bólusetningu til að fara í 1000 manna samkomutakmarkanir.“
Kári Stefánsson, forstjóri Íslenskrar erfðagreiningar, vonar að stjórnvöld aðlagi afléttingaráætlun sína að þessum nýju niðurstöðum: „Ég held því fram að það skipulag hafi byggst af þeirri þekkingu sem var til staðar í heilbrigðismálaráðuneytinu, nú erum við búin að útvega þeim nýtt módel til þess að vinna eftir og ég er handviss um að þau komi til með að taka mark á því. Allt annað væri mjög óskynsamlegt.“