Ýmsir þjóðþekktir einstaklingar létu áhugaverð ummæli falla í vikunni. Hér eru nokkur.
„Lýsir bara (að mínu mati rugluðu) hugarfari að tala um að hið opinbera „taki yfir eignarhald“ á eignum fólks.“
Katrín Atladóttir, borgarfulltrúi Sjálfstæðisflokksins, er hneyksluð á þeirri tillögu Sönnu Magdalenu Mörtudóttur, borgarfulltrúa Sósíalistaflokksins, að borgin taki yfir eignarhald lúxusíbúða, sem standa tómar, á hagstæðu verði, með það fyrir augum að koma þeim sem þurfa mest á húsæði að halda í húsnæði.
„Ég lenti í því að bróðir eins leikmanns í liðinu ýtti mér upp við vegg, sagði að ég ætti að skipta þessum leikmönnum út eða setja þessar í byrjunarliðið, ef ekki þá ætti ég að bíða eftir afleiðingunum. Þetta voru bara hótanir.“
Elísabet Gunnarsdóttir, þjálfari sænska liðsins Kristianstad, rifjar upp tímabil sitt sem þjálfari ÍBV í Vestmannaeyjum.
„Vera má að þvinguð sóttkví og einangrun sjúkra virki vel á búfé, en afar vanhugsað er að beita slíkum refsiaðferðum á sjálfstæða einstaklinga sem gangast sjálfviljugir undir prófanir.“
Jóhannes Loftsson, formaður Frjálshyggjufélagsins, telur að sú ákvörðun að þvinga fólk í sóttkví muni verða til þess að hagkerfið hrynji.
„Annars er það að frétta að sóttvarnalæknir heimilisins hefur einnig tekið að sér að vera ritstjóri. Nú hef ég verið settur í tímabundið tjáningarbann, sem tekur gildi á miðnætti, og er bannið sett á grundvelli þeirrar reglu að hafir þú ekkert fallegt og gott að segja, skaltu þegja. Einnig hafði það áhrif á bannið að nú væri ekki rétti tíminn til að vera með leiðindi og skapa úlfúð.“
Brynjar Níelsson, þingmaður Sjálfstæðisflokksins, um fjölskyldulífið.
„Af hverju heldur ríkisstjórnin „spilunum þétt að sér“ varðandi næstu aðgerðir? Bara svo hún geti trommað upp með lúðrablæstri og söng og deilt og drottnað af náð sinni?“
Illugi Jökulsson rithöfundur.
„Staðan er grafalvarleg og bregðast verður við strax af hálfu stjórnvalda, ef ekki á að fara mjög illa.“
Jóhannes Þór Skúlason, framkvæmdastjóri Samtaka ferðaþjónustunnar, um ástand ferðaþjónustunnar vegna COVID-19.
„Takið nú rakettuna úr rassinum á ykkur. Takið líka hausinn þaðan út til að þið getið áttað ykkur á heildarmyndinni.“
Sigríður Karlsdóttir, lífsleiknikennari og heilsuráðgjafi, hneykslast á þeim sem ekki virða samkomubann.