Skothríð lögreglu náðist á upptöku.
Lögreglumenn í Norður-Karólínufylki í Bandaríkjunum skutu mörgum skotum á hjólreiðamann og náðist það á upptöku. Atvikið átti sér stað fyrr í þessari viku. Ástæða viðbragða lögreglu var að hjólreiðamaðurinn var eftirlýstur fyrir að hafa skotið annan mann að ástæðulausu fyrir framan grunnskóla skömmu áður.
Hinn 38 ára Savell Hightower var handtekinn eftir skotbardaga við lögreglu en enginn særðist í þeim bardaga en maðurinn sem Hightower skaut hlaut ekki lífshættulega áverka af skotunum. Lögreglan hafði upp á Hightower þegar hann var að hjóla af vettvangi og hófst þá skothríð milli hans og lögreglu. Á upptöku af atvikinu sjást lögreglumenn skjóta á Hightower en óljóst er af upptökunni hvort hann hafi svarað fyrir sig en lögreglan fullyrðir að hann hafi skotið á lögreglumennina.
Hann hefur verið ákærður fyrir ýmis brot þar á meðal tilraun til morðs.
Hægt er að horfa á upptöku af atvikinu hér.