Bandaríska geimvísindastofnunin, Nasa, hefur nú tilkynnt hvaða fjórir geimfarar verða þess heiðurs aðnjótandi að fara í tunglleiðangur, þann fyrsta í 50 ár.
Samkvæmt BBC er Christina Koch fyrsti kvenkyns geimfarinn sem fer í tunglleiðangur og Victor Glover verður fyrsti svarti geimfarinn í slíkri ferð.
Með þeim fara Reid Wiseman og Jeremy Hansen en hópurinn mun fljúga í kringum tunglið seint á næsta árið eða snemma árs 2025. Geimfararnir munu ekki lenda á tunglinu, en verkefni þeirra mun ryðja brautina fyrir lendingu næsta hóps geimfara.
Geimfararnir, en þrír þeirra eru Bandarískir og einn þeirra Kanadískur, voru kynntir almenningi með athöfn í Houston, Texas. Munu þau nú hefja gríðarmiklar æfingar til að gera sig tilbúin fyrir ferðina.
Fram kemur í frétt BBC að með því að velja konu í ferðina, sem og dökkan mann er Nasa að standa við loforð sitt um meiri fjölbreytileika í verkefnum sínum. Áhafnir allra fyrri tunglferða innihélt hvíta karlmenn.