Sema Erla Serdaroglu segir ríkisstjórn Katrínar Jakobsdóttur og viðbrögð hennar við þjóðarmorði á Palestínumönnum, vera „smánarblett á íslenskri stjórnmálasögu.“
Nú standa yfir réttarhöld í Alþjóðadómstólnum í Haag en Suður Afríka hefur nú kært Ísrael fyrir þjóðarmorð. Sema Erla Sedaroglu hjá Solaris hjálparsamtökunum skrifaði Facebook-færslu á dögunum þar sem hún gagnrýnir ríkisstjórn Katrínar Jakobsdóttur harðlega fyrir meðferð hennar á palestínsku flóttafólki og viðbrögðum við þjóðarmorðinu sem á sér stað fyrir augum heimsins.
Í færslunni segir Sema Erla að ríkisstjórnin og viðbrögð hennar við þjóðarmorði og meðferð á flóttafólki, sé „smánarblettur á íslenskri stjórnmálasögu.“
Færsluna má lesa í heild sinni hér:
„Nú hafa ísraelsk stjórnvöld stundað þjóðernishreinsanir í Palestínu í hátt í 100 daga (og 75 ár). Á sama tíma er ríkisstjórn Katrínar Jakobsdóttur enn að neita flóttafólki frá Palestínu um alþjóðlega vernd, enn að þjónustusvipta flóttafólk frá Palestínu og þvinga það í heimilisleysi og hungursneyð og enn að brottvísa palestínsku flóttafólki frá Íslandi. Þá eru íslensk stjórmvöld ekki enn búin að koma þeim (ca.) 100 einstaklingum sem hafa fengið dvalarleyfi á grundvelli fjölskyldusameiningar frá Gaza og til Íslands og þau eru ekki enn búin að fordæma þjóðarmorð ísraelsríkis á Palestínu! Þessi ríkisstjórn, viðbrögð hennar við þjóðarmorði og meðferð á flóttafólki er smánarblettur á íslenskri stjórnmálasögu.“