Líklegt er að Ólafur Ásdísarson sé enn í varðhaldi í Osaka í Japan en hann var handtekinn eftir að hafa ráðist á leigubílstjóra í borginni í október. Utanríkisráðuneytið neitar að tjá sig um málið.
Utanríkisráðuneyti Íslands staðfesti við Mannlíf að einn Íslendingur sé í varðhaldi lögreglu í Japan um þessar mundir. Verður að teljast líklegt að um Ólaf Ásdísarson sé að ræða en hann réðst með hnefahöggum á leigubílstjóra í borginni Osaka í Japan í október. Náðist myndband af árásinni sem sýnt var í öllu helstu fjölmiðlum Japans.
Mannlíf sendi fyrirspurn á Utanríkisráðuneyti Íslands og spurði út í framvindu máls Ólafs en fékk þau svör að ekki gæti ráðuneytið tjáð sig um einstaka mál. Þegar Mannlíf innti ráðuneytið eftir því hversu margir Íslendingar væru í varðhaldi í Japan, var svarið það að einn Íslendingur væri í varðhaldi þar í landi. Móðir Ólafs Ásdísarsonar vildi ekki tjá sig um stöðu sonar síns þegar Mannlíf hafði samband við hana.