Líkamsleifar sem taldar eru af manni á fertugsaldri fundust í dag í mikið brunnum húsbíl í landi Torfastaða í Grafningi í Árnessýslu. Aðstandendum mannsins hefur verið tilkynnt um málið.
Lögreglan biður þá sem upplýsingar hafa um málið sem þeir telja að kunni að skipta máli við rannsóknina að hafa samband í síma 444-2000, á facebook eða með tölvupósti á [email protected]
Lögreglu barst tilkynning um brunann um klukkan 13.30 í dag. Eldsupptök eru til rannsóknar og eru ókunn. Það liggur fyrir að nokkurn tíma mun taka að staðfesta, með fullri vissu, auðkenni mannsins og eru aðstandendur meðvitaðir um verklag við þá vinnu.
Að rannsókninni í dag unnu, auk lögreglumanna af Suðurlandi, fulltrúar tæknideildar lögreglunnar á höfuðborgarsvæðinu, réttarmeinafræðingur og fulltrúar kennslanefndar ríkislögreglustjóra. Lögreglan á Suðurlandi biður þá sem telja sig hafa orðið vara við eld eða reyk á þessum slóðum í nótt eða framan af degi eða búa yfir upplýsingum sem þeir telja að kunni að skipta máli við rannsóknina að hafa samband í síma 444-2000, á facebook eða með tölvupósti á [email protected]