„Ég þarf alltaf að svara fyrir mig, en ég er að reyna að hætta því,“ segir Patrik Atlason eða Prettyboitjokko, sem var í viðtali í útvarpsþættinum; Í bítið á Bylgjunni í morgun. Patrik var spurður út ritdeilur og munnhögg sem hann hafði átt um ýmsa þjóðþekkta, meðal annars við Erp Eyvindarson á dögunum. Patrik viðurkennir að hann sé beinskeyttur og tali oft áður en hann hugsar, eitthvað sem hann verði að hætta.
En af hverju að hætta því?
„Ég þarf ekkert að gefa þessu liði einhvern gaum,“ útskýrir hann og kemur upp úr krafsinu að umboðsmaður hans, Birgitta Líf Björnsdóttir, hafi veitt honum tiltal.
Hefur það komið þér í vandræði?
„Það hefur alla vegana komið mér hingað, á Bylgjuna, á miðvikudegi,“ svarar hann og telur það ágætis árangur.
Prettyboitjokko heldur áfram og segir frá því að afa hans, Helga í Góu, hafi verið nóg boðið um daginn og hringt í sig og skammað. „Ég er búinn að svara Bubba, ég er búinn að svara Erpi og Bjögga Halldórs – En ég er nú ekki búinn að svara Agli Helga, mér finnst hann ekki eiga það skilið,“ segir hann kíminn.
Nú? Er hann á bakinu á þér líka?
„Já, hann er eitthvað á bakinu á mér líka. En hann fær ekki mína athygli. Það er bara fólk sem ég ber virðingu fyrir,“ svarar Patrik og uppsker óp þáttastjórnenda sem benda honum á að með þessum orðum hafi hann sannarlega verið að svara fyrir sig.