Í fjölmennu samfélagi matarunnenda á Facebook, Matartips!, fer nú fram umræða um hreindýrapaté sem meðlimur verslaði sér úti í búð. Verðið á kæfunni stóð eitthvað í viðkomandi sem ákvað í kjölfarið að skoða betur hvert væri innihald pakkningarinnar.
Og þá kom ýmislegt í ljós sem kemur fjölmörgum matarunnendum í hópnum á óvart. Málshefjandi lýsir upplifuninni með þessum hætti:
„Mig langaði að smakka hreindýrapaté, kíkti á verðið og svona stykki var á 3600 krónur í Krónunni. Sem betur fer kíkti ég líka á innihaldslýsingu….þetta ætti að heita hveitipaté með pálmaolíu og full af E efnum (16 samtals). Hreindýr er ekkert nema 7% í þessu. Mig langar að vita hvað er í þessu sem kostar 3600 krónur?! Hveiti? Olía? Öll þessi E? Ég mæli með að fylgjast vel með því hvað þið eruð að borga fyrir, það er verið að blekkja neytendur með flottum umbúðum og heiti á vörunni.“
Eins og gefur að skilja eru margir meðlimir hópsins svekktir eftir þessa lýsingu á innihaldi hreindýrakæfunnar. Þórhildur er sannarlega ein þeirra. „100% gæði en bara 7% hreindýr!, segir hún.
Margrét er heldur ekki sátt. „Kjúklingalifur, svínakjöt, svínafita, og pínulítið af hreindýrakjöti. Fullt af allskonar óhollustu og efnum. Og kalla þetta svo “hreindýrapaté”. Þetta verðlag á þessu er fáránlegt,“ segir Margrét ákveðin.
Birgir tekur í sama streng. „Það er meiri kjúklingalifur en hreindýr í þessu… Flokkast þetta nokkuð undir vörusvik?,“ spyr hann. Og Arnar nokkur er líka afar hissa. „Vá… 16 E-efni, sykur, gelatín, pálmaolía, pálmafita, rjómalíki, ofl. Hvernig enduðum við á Vesturlöndum á þessum stað? Hvernig kemst svona „matur“ í gegnum matvælaeftirlit?,“ spyr Arnar.