Þorbjörg Sólbjartsdóttir ólst upp við skelfilegar aðstæður.
Þorbjörg ræddi æsku sína ítarlega í hlaðvarpinu Sterk Saman en æska hennar einkenndist af mikilli drykkju foreldra, heimilisofbeldi og einelti í skóla.
„Pabbi beitti mömmu ofbeldi, eftir skilnaðinn hitti ég hann aldrei aftur og upplifði mikla höfnun. Hann hringdi við og við í gegnum árin en það stóðst aldrei neitt. Hann var auðvitað mjög veikur alkahólisti, eins og mamma,“ sagði Þorbjörg en hún bjó á Akranesi frá sjö ára aldri og þá höfðu foreldrar hennar skilið. Þorbjörg varð fljótt vön að sjá allskonar fólk koma heim til þeirra af barnum með móður hennar.
„Eina nóttina vaknaði ég við að það voru fimm menn komnir inn í herbergi þar sem ég og yngri bróðir minn sváfum. Ég hef alltaf verið þannig að ég hugsa um hvað gæti gerst. Ég er í raun heppin að ekkert gerðist þarna en mér finnst þetta útskýra vel hversu brengluð mamma var orðin af drykkju,“ sagði hún en telur að mamma hennar hafi reynt sitt besta.
„Hún reyndi sitt besta, ég sé það í dag. Ég man bara svo sterkt þegar hún kom full á foreldrafund í skólanum og ég hugsaði með mér að nú yrði okkur örugglega bjargað en það sagði enginn neitt. Ég var ekki örugg í skólanum út af einelti og ekki örugg heima út af ástandinu.“
Mbl.is greindi fyrst frá.