Umsátursástand stendur yfir í Grindavík en vopnaðir sérsveitarmenn hafa umkringt einbýlishús þar í bæ.
Samkvæmt frétt DV stendur yfir lögregluaðgerð fyrir utan einbýlishús við götuna Norðurvör í Grindavík. Sérsveit Ríkislögreglustjóra er á svæðinu auk sjúkrabíls og nokkurra lögreglubíla. Samkvæmt borgara sem DV talaði við eru sérsveitarmennirnir vopnaðir skotvopnum en lögreglan hefur ekki enn brotist til inngöngu í húsið, eftir því sem Mannlíf kemst næst.
„Sérsveitarmenn eru búnir að vopna sig upp og eru með skildi,“ sagði sjónarvotturinn. Hann hefur enga hugmynd um aðdraganda aðgerðarinnar en sagði svona mál vera viðkvæmt í litlum bæ á borð við Grindavík. Málið vekti mikla forvitni í bænum nú þegar. „Þetta er rétt hjá grunnskólanum og það eru krakkar að fara í áttina að þessu. Við erum forvitin í litlu bæjarfélagi.“
Ekki náðist í lögregluna á Suðurnesjum við gerð fréttarinnar.
Uppfært klukkan 15:17
Samkvæmt sjónarvotti er aðgerðum lögreglu og sérsveitarinnar nú lokið og allir farnir frá einbýlishúsinu.