Hin breska Kanika heldur úti síðu á samfélagsmiðlinum TikTok. Kanika er greind siðblind. Hún deilir sinni upplifun á röskuninni og gefur ráð.
Siðblinda er persónuleikaröskun skilgreind sem skortur á samúð og samlíðan. Siðblindir eru oftar en ekki lygasjúkir. Þeir ganga langt til að fá sínu framgengt, sama hvernig það skaðar aðra. Kanika segist óttalaus, hún ljúgi daglega og sjái ekki tilgang þess að taka ábyrgð á gjörðum sínum ef hún getur komist hjá því. Hún viðurkennir meðal annars að hafa gert tilraun til að myrða ömmu sína. „Það eru ekki margir siðblindir, einungis um 1-4 prósent af heiminum.“
Kanika birti myndband þar sem hún segir frá því hvernig hún sjálf fer að því að sjá siðblindu í öðrum. „Það fyrsta sem ég skoða eru augun, við erum með dauð augu. Ég þurfti að venja mig á að blikka oftar svo ég væri ekki að hræða fólk.“ Siðblindir einstaklingar eru oft sagðir heillandi, þeir segja það sem fólk vill heyra og tekur gjarnan upp á því að spegla aðra. „Ég segi eitthvað fáránlegt og sé hvort þeir spegli mig. „Ég segi til dæmis að ég prjóni í frítíma mínum og þó furðulegt sé þá gerir hann það líka, eða einhver náinn honum.“ Kanika segist sjá í gegnum tilgerða góðmennsku og lygar þeirra sem eru siðblindir. „Ég sýni þeim margar mismunandi tilfinningar og sé hvernig þeir bregðast við þeim. Siðblindir ljúga mikið, ég reyni að grípa þá við lygar.“