Í dag er akkurat ár frá því að Karl Ágúst Úlfsson losnaði við heilaæxlið sem hafði legið í leyni í einhver ár. Leikarinn góðkunni skrifaði Facebook-færslu af tilefninu.
Einn ástsælasti leikari þjóðarinnar, Karl Ágúst Úlfsson, minnist þess á Facebook að í dag er liðið nákvæmlega ár frá því að æxli var skorið úr heila hans. „Dagurinn í dag, 6. desember, er í bland átakanlegur og gleðilegur fyrir mig. Í dag er liðið nákvæmlega ár síðan kúpan á mér var opnuð og skorið burt æxli sem hafði árum saman legið þar í leyni – gert mér ýmsar skráveifur en aldrei látið vita af sér.“ Segist hann senda æxlinu kveðju í tilefni dagsins: „Ekki vinarkveðju, en samt þakkir fyrir reynsluna sem það skaffaði mér og ég hef þurft að takast á við þetta árið. Og ég vona að það fyrirgefi mér að ég hafi ekki sóst eftir lengra sambandi, heldur gert það útlægt úr höfði mínu. Vertu sælt. Sjáumst ekki framar, en geymum minningarnar.“
Birtir Karl Ágúst svo tvær ljósmyndir, önnur þeirra af honum daginn eftir aðgerðina og hin af myndlistarljóði sem hann orti sjálfum sér að óvörum, nokkrum dögum síðar, eins og hann orðar það. „Skáldlegra en margt sem ég hef gert.“