Söngvaskáldið Bubbi Morthens er strandaglópur eftir að Icelandair sveik hann með því að fresta flugi frá Krít til Íslands. Fluginu var frestað um hálfan sólarhring sem þýddi að Bubbi kemst ekki í áformaða veiði í Laxá í Aðaldal. Hann segist sitja uppi með mikið fjárhagstjón.
Farþegum útveguð gisting á hóteli yfir nóttina eftir frestunina. „Verslunarmannahelgin er farin og þú gerir ekki mikið í svona bið með börn,“ sagði Bubbi, fjúkkandi reiður, við vefmiðlinn Vísi en hann er á ferð með eiginkonu sinni, Hrafnhildi Hafsteinsdóttur og börnum þeirra.
Bubbi er ekkert á þeim buxunum að fyrirgefa flugfélaginu sem hann segir að hafi gefið takmarkaðar upplýsingar um það sem var í gangi. Hann íhugar nú að grípa til aðgerða gegn félaginu og ætlar að ráðgast við lögfræðing. Frægt er þegar Bubbi spurði um það í einum texta sinna hvort lögfræðingar hefðu sál. Samráð við slíkan einstakling undirstrikar þannig alvöru málsins. Bubbi og fjölskylda eru væntanleg til Íslands í kvöld …