Gunnar Smári Egilsson, leiðtogi Sósíalistaflokksins, er á mörkum þess að tryggja að flokkur hans nái inn manni á þing. Þetta veldur Sjálfstæðismönnum ama og hugarangri og var ekki ábætandi með Kristrúnu Frostadóttur og Samfylkinguna farandi með himinskautum í fylgi. Þegar svona illa stendur á hjá flokknum er Hannes Hólmsteinn Gissurarson eftirlaunaprófessor sendur fram á vígvöllinn til að tuska óvinina til. Hannes er í fullu fjöri og hefur nægan tíma þessa dagana, lítt slitinn, eftir ævistarf á fóðrum hjá ríkissjóði.
Einhverjum hefur væntanlega svelgst á morgunkaffinu þegar færsla Hannesar dúkkaði upp á Facebook. Þar er Gunnari Smára velt upp úr tjöru og fiðri og hann sagður vera „illgjarnasti og hatursfyllsti penni landsins“. Rifjað er upp að hann var í nokkur ár á mála hjá auðjöfrum fyrir milljónir á mánuði og hafi flogið um á einkaþotum þeirra. „Öll blöð, sem hann hefur komið nálægt, hafa orðið gjaldþrota. Hann er sannkallaður blaðabani. Núna þykist hann vera sósíalisti og verkalýðsleiðtogi,“ skrifar Hannes.
Líklegt er að færsla Hannesar styrki Gunnar Smára fremur en hitt, enda þykir frekar farsælt að hafa prófessorinn hrasgjarna í óvinaliði sínu …