Heitir sumardagar eru kannski ekki svo margir hér á Fróni og því er nauðsynlegt að gera sem mest úr slíkum dýrðardögum. Svalandi gosdrykkir eru til dæmis hluti af stemningunni og gaman að útbúa sitt eigið síróp sem er svo blandað út í sódavatn. Þannig er líka auðvelt að stjórna sykurmagninu og búa til sínar eftirlætisbragðtegundir.
-Uppskriftirnar eru fyrir u.þ.b. 4-5 dl af sírópi.
-Blandið í hlutföllunum 1 hluti síróp á móti 4-6 hlutum sódavatn, eftir smekk.
-Það er tilvalið að nota ber og ávexti sem eru á „síðasta snúningi“ eða hafa jafnvel gleymst í frystinum.
-Krökkum finnst gaman að búa til sitt eigið gos. Rabarbara, rifsber, hundasúrur o.fl. má finna úti í garði og malla saman í síróp.
-Heimalagað síróp geymist í 1-2 vikur í lokuðu íláti í kæli.
Kirsuberjagos
1 krukka kirsuber í safa (u.þ.b. 680 g) eða u.þ.b. 400 g frosin kirsuber
safi úr 1 appelsínu
2 dl sykur
Setjið allt í pott og látið malla saman í 15-20 mín. Hellið í gegnum fínt sigti, notið bakhliðina á sleif til þess að merja sem mest af vökvanum úr og látið kólna.
Engifergos
3-4 dl ferskt engifer, skorið í grófa bita, óþarfi að afhýða
1 ½ dl hrásykur
2 dl vatn
safi úr ½ sítrónu
Setjið allt í pott og látið malla saman í 15-20 mín. Látið kólna í pottinum og hellið í gegnum fínt sigti.
Ananasgos með rósmaríni
u.þ.b. ½ ferskur ananas, afhýddur og skorinn gróft
1-2 greinar rósmarín
4-5 cm ferskt engifer, fínt skorið
4 msk. agave-síróp
safi úr ½ sítrónu
2 dl vatn
Setjið allt í pott og látið malla undir loki í 15-20 mín. Veiðið rósmaríngreinarnar upp úr, setjið blönduna í matvinnsluvél eða blandara og maukið vel. Hellið maukinu í gegnum fínt sigti, notið bakhliðina á sleif til þess að merja sem mest af vökvanum úr og látið kólna.
Bláberja- og brómberjagos með myntu
250 g bláber
250 g brómber
1-2 greinar mynta
3 dl vatn
½ dl agave-síróp
½ dl hrásykur
Setjið allt í pott og látið malla saman í 15-20 mín. Hellið í gegnum fínt sigti, notið bakhliðina á sleif til þess að merja sem mest af vökvanum úr og látið kólna.
Umsjón/Kristín Dröfn Einarsdóttir