Lögreglan á höfuðborgarsvæðinu hafði í nógu að snúast í í gærkvöldi og nótt. Þannig þurfti hún að hafa afskipti af manni í austurborginni sem var með rafstuðkylfu (tazer). Kylfan var haldlögð og er maðurinn grunaður um brot á vopnalögum.
Í miðbæ Reykjavíkur var maður í stunguvesti með sveðju. Hann var staddur við veitingastað þegar lögregla hafði afskipti af honum rétt fyrir klukkan hálf eitt í nótt. Hann var handtekinn og fluttur á lögreglusöð þar sem hann var kærður fyrir brot á vopnalögum en síðan látinn laus. Lögregla haldlagði bæði vestið og hnífinn.
Stuttu fyrir klukkan fimm í nótt voru menn í annarlegu ástandi handteknir í miðborginni. Fyrri maðurinn er grunaður um líkamsárás og var sagður hafa verið að veitast að fólki. Hann var vistaður í fangageymslu lögreglu. Í hinu tilfellinu var um að ræða tvo unga menn sem einnig voru í annarlegu ástandi og grunaðir um líkamsárás. Þeir voru sömuleiðis vistaðir fyrir rannsókn máls í fangageymslu lögreglu.
Þónokkuð var um akstur undir áhrifum áfengis eða annarra vímugjafa. Sömuleiðis var eitthvað um að fólk væri tekið fyrir hraðakstur þar sem lögregla var við mælingar.