Marta María Jónasdóttur, blaðamaður Morgunblaðsins, var í liðinni viku með frétt um það að Þórður Snær Júlíusson, ritstjóri Heimildarinnar, byggi í lúxusíbúð sem kosti um 100 milljónir króna. Marta vísaði nákvæmlega á heimili ritstjórans á Smartlandi Moggans. Áður hafði hún fjallað um eignir annarra starfsmanna Heimildarinnar og vísað á þær í óljósum tilgangi.
Þeir sem hafa lágmarksþekkingu á fasteignamarkaði gera sér grein fyrir að þetta er þá einhver ódýrasta lúxusíbúð á landinu. Mogginn hefur aftur á móti ekki fjallað um fasteign Mörtu og Páls Winkel fangelsismálastjóra sem svo sannarlega búa í lúxus, samkvæmt skilgreiningu Moggans, eins og Mannlíf fjallaði um. Parið virðist gera það gott ef marka má að eign þeirra á Álftanesi kostar ekki undir 200 milljónum króna. Óljóst er þó með skuldirnar.
DV fjallaði um málið og vísaði í Twitterfærslu Þórðar sem benti á að rangt væri farið með í lýsingu á eign hans. Myndir með greininni reyndust í einhverju tilviki ekki eiga við um umrædda eign og lýsing á henni var broguð.
„Mogginn er svo fyndinn. Stanslaust í einhverjum súrrealískum hit-djobbum. En ég bý semsagt í blokk í hverfinu sem ég ólst upp í og myndirnar af svölunum sem fylgja með eru sannarlega ekki mínar svalir …,“ skrifar Þórður. Þarna myndgerist hið fornkveðna um flísina og bjálkann …