Eiríkur Rögnvaldsson, fyrrverandi prófessor í íslenskri málfræði við Háskóli Íslands, segir þeim til syndanna á Facebook sem telja að Freyja Haraldsdóttir óhæf til að taka við fósturbarni. Margir eru sammála honum en ritstjórinn Sigurjón Magnús Egilsson skrifar til að mynda: „Virkilega vel hugsað – og skrifað.“
Eiríkur segir umræðuna hafa verið ótrúlega. „Ég hef séð ótrúlegar umræður á netinu um úrskurð Barnaverndarstofu um hæfi Freyju Haraldsdóttur sem fósturforeldris. Það sem máli skiptir er að þetta er úrskurður sem byggist á ítarlegri könnun málsgagna, kveðinn upp af þar til bærum yfirvöldum sem hafa á að skipa sérfræðingum á ýmsum sviðum. Freyja hefur það því fram yfir okkur flest að hafa verið metin hæf til að ala upp barn – við hin teljum hæfi okkar til þess yfirleitt hafið yfir vafa og brygðumst ókvæða við ef eitthvert fólk úti í bæ sem ekkert þekkti til okkar drægi það í efa,“ segir Eiríkur.
Hann segir að sem betur fer þá sé Freyja löngu komin með þykkan skráp. „Eftir sem áður getum við auðvitað haft okkar skoðanir á réttmæti þessa úrskurðar. En þeim skoðunum ættum við að halda fyrir okkur sjálf en ekki viðra þær í allra augsýn. Það er ótrúlegt og óþolandi að fólk haldi því blákalt fram, iðulega eftir að hafa tekið fram að það séu sko engir fötlunarfordómar sem búi þar að baki, að nafngreind manneskja sem það þekkir ekki sé tæpast fær um að ala upp barn. Sem betur fer – og því miður – er Freyja ýmsu vön og stendur þetta af sér, en ég er hræddur um að okkur þætti flestum nærri okkur höggvið ef við lentum í slíkri orrahríð.“