Uppnám varð í bæjarpólitíkinni á Ísafirði þegar Sif Huld Albertsdóttir bæjarfulltrúi sjálfstæðisflokksins sagði af sér vegna eineltis sem hún varð fyrir af hendi Margrétar Geirsdóttur sviðsstjóra velferðarsviðs Ísafjarðarbæjar. Sif hefur ákveðið að lögsækja Ísafjarðarbæ vegna þessa og þá telur hún að bærinn skuldi henni formlega afsökunarbeiðni vegna málsins.
Bæjarstjóri Ísafjarðarbæjar, Birgir Gunnarsson segir aftur á móti að Sif sé þegar búin að fá afsökunarbeiðni:
„Niðurstöður úttektarinnar voru kynntar í lok mars. Í kjölfar þess var fundur sem sátu mannauðsstjóri Ísafjarðarbæjar, Baldur Ingi Jónsson, formaður stjórnar BsVest, Jón Páll Hreinsson bæjarstjóri Bolungarvíkur, og framkvæmdastjóri BsVest, Sif Huld Albertsdóttir“ segir Birgir sem einnig sat fundinn, og bætir við:
„Á þeim fundi var framkvæmdastjóri BsVest, Sif Huld Albertsdóttir, beðin afsökunar á þeirri framkomu sem hún hafði þurft að þola.
Aðspurður segir Birgir að Margrét Geirsdóttir njóti trausts og að hún haldi sínu starfi.
„Það er mikilvægt að halda því til haga að Sif verður ekki fyrir einelti sem bæjarfulltrúi heldur sem framkvæmdastjóri Byggðasamlags um málefni fatlaðra á Vestfjörðum. Byggðasamlagið heyrir undir sérstaka stjórn og Sif er þar af leiðandi ekki starfsmaður Ísafjarðarbæjar. Þær tillögur sem unnið var með eftir að niðurstöður úttektar lágu fyrir gerðu ekki ráð fyrir öðru en að þær yrðu báðar áfram í sínum störfum. Margrét er í sínu starfi hjá Ísafjarðarbæ og nýtur trausts sem slík.“
Í samtali við Mannlíf vildi Sif Huld ekkert láta eftir sér hafa en staðfesti þó að hún vilji fá formlega afsökunarbeiðni frá bænum vegna málsins.