17 mánaða stúlka, Bella-Rae Birch, lést af sárum sínum eftir árás hunds á heimili sínu í St. Helens í Bretlandi. Fjölskyldan hafði fengið sér hundinn aðeins viku fyrir árásina Ekki er vitað með vissu hvaða tegund hundurinn var en nágranni fjölskyldunnar telur hann hafa verið annað hvort af tegundinni Pitbull Terrier eða Staffordshire Bull Terrier.
Lögregla fékk tilkynningu um árásina rétt fyrir klukkan fjögur í gær. Fjöldi lögreglubíla voru kallaðir út þegar í ljós kom hversu alvarlegt málið væri. Reynt var að endurlífga stúlkuna en hún var úrskurðuð látin á sjúkrahúsi.
Nágrönnum fjölskyldunnar var mjög brugðið, enda er hverfið talið öruggt og lítið sem ekkert um glæpi eða svona stór slys á svæðinu. Nokkrir sáu móður stúlkunnar gráta og öskra fyrir utan húsið. Fjölskyldan var vel liðin af nágrönnum og sögð vinaleg, litla stúlkan var sögð glaðleg og skemmtileg.
Hundurinn var svæfður og er nú rannsakað hvort að um ólöglega blöndu af tegundum sé að ræða.