Sanna Marin, forsætisráðherra Finnlands, gekk í gær að eiga sambýlismann sinn til fjölda ára fótboltamanninn Markus Räikkönen. Sanna segir frá brúðkaupinu á Instagram-síðu sinni með textanum: „Við deildum æskunni, urðum fullorðin saman og höfum vaxið sem foreldrar okkar elskuðu dóttur,“ segir forsætisráðherrann í færslunni. „Af öllu fólki ert þú sá rétti fyrir mig. Takk fyrir að standa við hlið mér,“ sagði Sanna meðal annars.
Veislan var haldin í embættisbústað forsætisráðherrans, Villa Bjälbo í Helsinki, og gestirnir voru fjörutíu talsins.
Sanna og Markus eru bæði 34 ára og hafa verið saman í sextán ár. Dóttir þeirra er tveggja ára.
Sanna er annar forsætisráðherrann á Norðurlöndunum sem giftir sig á skömmum tíma því fyrir tveimur vikum gekk Mette Frederiksen, forsætisráðherra Danmerkur, að eiga kvikmyndatökumanninn Bo Tengberg.