Halldór Halldórsson, sem er fyrsti hjarta- og lungnaþeginn hér á landi, er búinn að fá tvær sprautur fyrir Covid-19 og er því fullbólusettur. Samt sem áður mælist hann ekki með mótefni í blóðinu.
Halldór er á ónæmisbælandi lyfjum, sem og allir aðrir líffæraþegar og fleiri til, sem er orsök þess að ekki myndast mótefni í blóði hans.
Fram að bólusetningu segist Halldór hafa reynt eftir fremsta megni að fara varlega. „Ég persónulega hef engan áhuga á að fá covid ofan í ígrætt hjarta, lungu og nýra. Maður veit svo sem ekki hvernig maður kemur út úr því,“ sagði Halldór í samtali við Rás 2 í morgun.
Hann fann fyrir miklum létti og öryggiskennd eftir að hafa verið bólusettur, en ákvað þó að fara í mótefnamælingu fimm vikum eftir bólusetningu og fékk þá þessar niðurstöður. „Þá upplifir maður aftur þetta óöryggi.“
Í kjölfarið vöknuðu spurningar hjá Halldóri varðandi aðrar bólusetningar, hvort einhver mótefni væru að myndast við þær. Hann fer til að mynda árlega í flensubólusetningu og á fimm ára fresti í bólusetningu við lungnabólgu. En nú spyr hann sig hvort mögulega sé þetta einungis falskt öryggi sem hann og aðrir líffæraþegar búi við.
Halldór segir þetta vera afar óákjósanleg staða, sér í lagi þar sem verið sé að létta sóttvarnarráðstöfunum. „Þetta er rosa óþægilegt að vera í þessari stöðu þegar maður veit ekki hvernig maður á að haga sér. Vitandi það að maður veit ekkert hvar maður stendur gagnvart mótefnamælingu.“
Halldór segir stóran hóp á ónæmisbælandi lyfjum og óskar hann eftir úrræðum fyrir hann. „Mín skoðun að það þurfi að finnast eitthvað svar við þessu svo fólk sem er á þessum lyfjum geti andað léttar.“