Inga Sæland sendi í dag grein í Morgunblaðið þar sem hún kvartar undan fréttaflutningi Stundarinnar um tillögur Flokks fólksi í skattamálum. Inga sá sig knúna til að leiðrétta þetta.
„Ég varð virkilega undrandi og ef satt skal segja döpur þann 7. september þegar ég opnaði Stundina og sá fyrirsögnina „Tillögur Flokks fólksins í skattmálum kosta ríkissjóð á annan hundrað milljarða.“ Hún segist þó hafa róast fljótlega þegar hún las greinina því staðhæfingarnar um kostnað upp á hundruði milljarða væri fengnar úr tillögum Flokks fólksins, ættu ekki við rök að styðjast. Þá segist Inga ekki það koma sér á óvart þegar hún les óvandaða og falska umfjöllun um mál Flokks fólksins. „En mín reynsla af fréttum Stundarinnar hefur hingað til verið jákvæð. Því vil ég trúa, að hér hafi einungis verið um misskilning að ræða sem ég finn mig knúna til að leiðrétta.“
Í grein Stundarinnar er gefið í skyn að tillögur flokks Ingu myndu allt að því setja ríkissjóð á hausinn. „Vísað er í svör fjármálaráðherra við fyrirspurn um hvað það myndi kosta að hækka skattleysismörk upp í 350.000 kr. á mánuði með flatri hækkun á alla launaþega. Flokkur fólksins hefur aldrei lagt fram slíkar tillögur. Aldrei!“ Inga heldur áfram og segir hvað Flokkur fólksins hefur lagt til í raun. „Við höfum alla tíð talað um að taka upp fallandi persónuafslátt sem myndi tryggja láglaunafólki 350.000 kr. skattleysismörk með tilfærslu innan skattkerfisins.“ Þannig myndi hálaunafólk hafa lægri persónuafslátt en aftur á móti láglaunafólk hærri „Persónuafslátturinn myndi þannig tryggja láglaunafólki 350.000 kr. skattleysismörk, en eftir því sem tekjur aukast lækka skattleysismörk viðkomandi,“ segir Inga ennfremur í grein sinni.
Inga skýtur svo örfínt á ríkisstjórnina. „Þessi aðgerð myndi t.d. lækka skatta hjá lágtekjufólki töluvert meira en nýja lágtekjuskattþrepið sem ríkisstjórnin kynnti í lok ársins 2019 og hælir sér hvað mest af.“
Að lokum segir Inga að hægt sé að sjá allt um tillögur þeirra inni á vef Alþingis. „Flokkur fólksins hefur margoft rætt um og einnig mælt fyrir málinu á Alþingi, margoft skrifað greinagerðir um það og fengið sérfræðinga til að vinna skýrslur því samhliða. Allt þetta er sjáanlegt á heimasíðu Alþingis, althingi.is“