Boðað hefur verið til bænastundar í Landakotskirkju klukkan 13.00 í dag, laugardaginn 22. apríl. Kristófer Gajowski, skipulagsstjóri Support for Ukraine Iceland, stendur að athöfninni, segir í frétt á Vísi.is.
Fram hefur komið í fjölmiðlum að ungi maðurinn sem lést hafi verið pólskur.
„Mér rann blóðið til skyldunnar að skipuleggja þennan viðburð. Þessir atburðir hafa tekið mjög á pólska samfélagið á Íslandi og ég finn fyrir því að það er mikil reiði vegna málsins,“ segir Kristófer í samtali við blaðamann Vísis.
„Þetta er mikið áfall. Við erum öll Íslendingar og við þurfum að standa saman gegn svona ofbeldi. Það eru allir velkomnir í kirkjuna á eftir, þetta á að vera róleg og falleg stund þar sem við komum saman og hugsum til þessa fólks,“ segir Kristófer.
„Ég á sjálfur sextán ára dreng hér heima og maður hefur miklar áhyggjur af þessu, hvernig verður þetta þegar hann fer að kíkja út á lífið?“
Samkvæmt upplýsingum frá lögreglu sitja fjórir í gæsluvarðhaldi og eru allir einstaklingarnir yngri en 20 ára.