Kolbrún Tanja Eggertsdóttir er 31 árs Hvergerðingur sem starfar fyrir Árborg. Eiginmaður Kolbrúnar er Sigurður Rúnar Ingason, smiður, og saman eiga þau börnin Mikael Óðinn og Arndísi Míu. Kolbrún er Neytandi Vikunnar.
Gerir þú verðsamanburð á vörum og þjónustu?
Já, ég reyni að vera meðvituð um verðmun ásamt því að hafa gæði í huga þegar kemur að fatnaði, heimilistækjum, húsgögnum eða t.d. utanlandsferðum.
Hvernig sparar þú í matarinnkaupum?
Ég er ekkert endilega að spara í matarinnkaupum, ég kaupi oft frekar dýrari vörur sem eru þá með betri næringu. Ég reyni að eiga frekar til epli/appelsínur/banana frekar en t.d. vínber. Ég reyni hins vegar að vera dugleg að versla í Krónunni til þess að nýta aukakrónur þegar kemur að matarinnkaupum fyrir jólin.
Endurnýtir þú? Ertu með ráð til annarra?
Ég versla mikið í Barnaloppunni og á þess háttar stöðum þegar kemur að fatnaði fyrir börnin mín. Hef lika keypt bækur og annað dót þar.
Hvað hefur þú í huga þegar þú kaupir mat, fatnað og gjafir?
Þegar ég versla í matinn reyni ég að velja vörur sem eru næringaríkar og tek frekar þær sem hafa skráargatið á umbúðunum. Ég reyni alltaf að finna notuð föt sem eru vel með farin áður en ég fer í að kaupa nýtt á krakkana mína. Þegar kemur að gjöfum þá kaupi ég bara eitthvað sem mér finnst vera sniðugt fyrir viðkomandi, hef samt verið dugleg að nýta mér tilboð á dekri eða gjafakort á góðum veitingastöðum.
Hverju átt þú erfiðast með að draga úr kaupum á?
Ætli það sé ekki bara mjólkurvörurnar, í hverri einustu búðarferð kaupi ég mjólk, smjör og ost…
Skiptir umhverfisvernd þig máli?
Já, ég myndi segja það. Krakkarnir læra líka mikið um þetta í leik- og grunnskóla sem eykur metnaðinn hjá þeim að hugsa vel um umhverfið sitt.
Annað sem þú vilt taka fram?
Nei, takk fyrir mig.