Ólafur Ísleifsson, fyrrverandi þingmaður Miðflokksins, hneykslast á Facebook yfir áformum um að afglæpavæða fíkniefni. Skoðanir hans virðast þó fá lítinn hljómgrun og lætur móðir fíkils hann heyra það í athugasemd við færsluna.
Ólafur skrifar: „Í Kastljósi er mælt með svokallaðri afglæpavæðingu eiturlyfja og fullyrt hún muni bjarga lífum. Þannig styður Ríkisútvarpið þá eiturefnaherferð sem rekin er gegn íslensku æskufólki. Varsla eiturefna á skv. frumvarpi ekki að vera saknæm en hún er það á Norðurlöndum og öðrum löndum sem við berum okkur saman við. Í gildandi lögum eru talin upp mörg óþverraefni, m.a. heróín og annað eftir því. Á öllu þessu skal slakað. Heilbrigðisráðherra kemur úr heimi íþrótta. Hvernig getur maðurinn lagt nafn sitt við þetta? Hvers vegna tekur Ríkisútvarpið undir með þeim öflum sem vilja greiða leið eiturefna að íslenskri æsku?“
Móðir nokkur skrifar athugasemd við færsluna og segir barn sitt fíkil. Hún styðji þó afglæpavæðingu fíkniefna. „Verandi móðir fíkla, þá styð ég þetta. Hvaða möguleika í lífinu, á einstaklingur sem skuldar milljónir í sektum? Hvaða löngun ætti viðkomandi að hafa til að verða edrú, hvað tekur við?,“ spyr Ólaf sem enn hefur ekki svarað.