Youtube myndband Reykjavíkurborgar sem sýndi fund íbúaráðs Laugardals hefur verið tekið út af miðlinum og sett aftur inn. Samskipti tveggja starfsmanna borgarinnar, Eiríks Búa Halldórssonar, verkefnastjóra verkefnisins Hverfið mitt og Guðnýjar Báru Jónsdóttur, verkefnastjóra hjá lýðræðis-og mannréttindastofu, hafa verið falin í myndbandinu. DV greindi fyrst frá mistökum Eiríks Búa sem urðu til þess að skilaboð á milli hans og Guðnýjar sáust á fundi íbúaráðs sem sýndur var í beinni útsendingu. Þar ræddu þau fyrirspurn um stöðu leikskólamála sem Íbúasamtök Laugardals lögðu fyrir. Samtalið virtist snúast mikið til um að komast hjá því að svara fyrirspurninni. „Já vertu bara harður við þau. Enginn formaður né varaformaður þú ræður. Það er alltaf þannig að svar við fyrirspurn er bara lagt fram og ekkert framhald af því,“ sagði Guðný meðal annars. Eiríkur sagðist hafa „kæft þetta.“ Þá gefur Guðný þau ráð að alltaf sé gott að þegja og segja ekki neitt og hvetur samstarfsfélaga sinn að láta eins og þetta komi honum ekki við.
Umræða skapaðist í Facebook hópnum Leikskólamál í lamasessi þar sem meðlimum blöskraði samskipti Guðnýjar og Eiríks. „Á bara í alvörunni að kæfa umræðu foreldra sem hafa áhyggjur af því hversu lengi þau þurfa að vera tekjulaus??“