Jódís Skúladóttir er 45 ára Fellbæingur og þingmaður Norðausturkjördæmis fyrir Vinstrihreyfinguna grænt framboð. Hún er stúdent frá Menntaskólanum á Egilsstöðum og er með BS-próf í viðskiptalögfræði frá Háskólanum á Bifröst. Þá er hún með ML-próf í lögfræði úr Háskóla Reykjavíkur. Jódís er fjögurra barna móðir. Hún er þekkt fyrir hressleika og húmor og fyrir mikinn sannfæringarkraft. Jódís er Neytandi vikunnar.
Gerir þú verðsamanburð á vörum og þjónustu?
Já eftir bestu getu.
Hvernig sparar þú í matarinnkaupum?
Ég rækta mikið sjálf, stunda stang- og skotveiði og svo leita ég hagstæðra tilboða.
Endurnýtir þú? Ertu með ráð til annarra?
Já ég versla eins lítið og ég get af óþarfa. Fatnað versla ég helst á loppumörkuðum og gef svo áfram.
Hvað hefur þú í huga þegar þú kaupir mat, fatnað og gjafir?
Ég spyr mig gjarnan hvort mig vanti þetta raunverulega. Ég huga svo að umhverfisspori, gæðum og verði.
Hverju átt þú erfiðast með að draga úr kaupum á?
Heiðarlegasta svarið sem ég get gefið þér er gosdrykkir…
Skiptir umhverfisvernd þig máli?
Hún skiptir mig mjög miklu máli og ég er tilbúin að leggja talsvert á mig til að geta staðið með umhverfinu
Annað sem þú vilt taka fram?
Við þurfum öll að huga að neyslu okkar og taka ábyrgð. Matarsóun er mikið vandamál og þar þurfum við að gera betur. Stöldrum við í búðinni og hugsum okkur um áður en við setjum hluti í körfuna og spyrjum okkur alltaf: þarf ég þetta raunverulega?