Rithöfundurinn og þjóðfélagsrýnirinn Illugi Jökulsson er mikill pottakall og greinir stundum frá pottaævintýrum sínum á samfélagsmiðlinum Facebook. Hann setti inn heldur betur fallega færslu um upplifun sína í heitum potti fyrr í dag.
„Þegar ég kom í heita pottinn áðan var þar fyrir par svona um þrítugt og letilegt nokkuð, þau áttu greinilega tvö ung börn sem voru að leik í barnapottinum og þau kölluðu stundum eitthvað vingjarnlegt til þeirra svo börnin vissu að þau væru þarna, en annars sátu þau bara þarna tvö í síðdegissólinni, værukær og þögul,“ skrifaði fjölmiðlamaðurinn knái á Facebook.
„Ég var brátt líka nánast farinn að dotta en veitti því samt athygli að hann hafði tilhneigingu til að snerta hana, kom við öxl hennar eða læri ofurlétt og bara andartak með einum eða tveim fingrum og þá brosti hún svolítið án þess að líta á hann. Og enn leið stund og logandi sólin var alveg að verða kvöldsól og börnin skríktu í barnapottinum, og þá hallaði hún sér að honum og hvíslaði svo lágt að varla heyrðist: „Ég held í alvöru að við höfum verið dæmd til að vera hamingjusöm“.“
Gífurlega hjartnæm saga á þessum kalda laugardegi.