Fyrir tveimur dögum greindi Mannlíf frá því að IKEA á Íslandi hafi hætt í viðskiptum við fjártæknifyrirtækið Rapyd. IKEA hefur sent frá sér yfirlýsingu vegna málsins.
„Vegna frétta um að IKEA á Íslandi hafi slitið viðskiptum við Rapyd um greiðslumiðlun af stjórnmálalegum ástæðum vill IKEA taka fram að engin slík sjónarmið bjuggu að baki við ákvörðun verslunarinnar.
Nokkrir mánuðir eru síðan IKEA samdi við aðra greiðslumiðlun á grundvelli hagstæðari kjara eins og ávallt er leitast við að gera til að halda vöruverði í lágmarki eins og IKEA er þekkt fyrir.
Viðringarfyllst,
IKEA á íslandi,
Stefán Rúnar Dagsson
framkvæmdastjóri“
Rétt er að taka fram að hvergi í frétt Mannlífs er gefin upp ástæða þess að IKEA hætti í viðskiptum við Rapyd. Þá reyndi Mannlíf ítrekað að ná sambandi við Stefán Dagsson, framkvæmdastjóra IKEA, Guðnýju Aradóttur, verslunarstjóra IKEA og aðra stjórnendur í gegnum tölvupóst og síma til að reyna fá uppgefna ástæðu fyrir því að IKEA hætti í viðskiptasambandi við Rapyd. Þær fyrirspurnir voru hunsaðar.