„Ég fór í bankann í dag til að taka út 10.000 krónur. Gjaldkerinn benti mér kurteislega á að það kostaði 300 krónur,“ skrifar Ólafur Páll Gunnarsson, útvarpsmaður og viðskiptavinur Íslandsbanka á Akranesi sem var rukkaður fyrir að taka út eigin peninga úr bankanum.
Hann skrifaði reiðifærslu á Facebook vegna þessa og bendir á græðgina sem nær til þess að kroppa í inneignir viðskiptavina.
„Bankinn geymir launin mín og í raun alla peninga sem ég „á“ á hverjum tíma. Ég lána bankanum peningana mína sem hann lánar áfram með góðum feitum vöxtum á meðan raunvirði peninganna minna rýrnar á reikningnum. Svo er ég rukkaður um 300 kall fyrir að fá aðhentan einn peningaseðil hjá gjaldkera,“ skrifar Ólafur Páll.
Hann hefur lengi verið í viðskiptum við Íslandsbanka á Akranesi og lengst af ánægður.
„Ég hef verið í bankaviðskiptum við Íslandsbanka undanfarin ár. Það er gott útibú á Akranesi og gott starfsfólk sem ég þekki flest með nafni,“ skrifar hann og rifjar upp að Íslandsbanki hagnaðist um 24.5 milljarða í fyrra. „Mér verður óglatt,“ skrifar hann.