Neytandi vikunnar er Ragnheiður Ingimundardóttir. Hún er 65 ára og er verslunarstjóri í Vínbúðinni. Ragnheiður þarf að auki að þiggja atvinnuleysisbætur, því hún er einungis í 45 prósent stöðugildi í vínbúðinni.vínbúðinni á Hólmavík. Eiginmaður Ragnheiðar er öryrki en í sumar nær hann 67 ára og verður því ellilífeyrisþegi.
Hve miklu eyðir fjölskyldan í mat og aðrar rekstrarvörur heimilisins á mánuði og hvar verslar hún helst ?
„Með bensíni þá gæti það verið um það bil 150.000 þúsund krónur. Ég versla aðallega í Krónunni þar sem verðlag þar er miklu lægra en í Krambúðinni sem er eina verslunin á Hólmavík. Ég neyðist þó til þess að kaupa mjólk þar, þótt hún sé 50 krónum dýrari en í Bónus og Krónunni.“
Hvað með sparnað í matarinnkaupum ?
„Ég versla mikið í einu þegar ég fer suður og spara þannig og svo kaupi ég kjöt á haustin af bónda.“
Leggur þú fyrir, og hvaða leiðir notar þú ef svo er ?
„Við höfum lítið sem ekkert afgangs til að leggja fyrir en reynum að vera með sparnaðar- reikning.“
Telur þú álagningu verslana sanngjarna og gerir þú verðsamanburð á vörum og þjónustu ?
„Álagningin út á landi er alltof mikil og ég reyni að gera verðsamanburð þegar ég hef tækifæri til. Ég vill taka fram að það fara til dæmis talsverðar fjárhæðir í rafmagn hér og þar sem við búum úti í sveit þá þurfum við að greiða 15.000 krónur aukalega þannig að ef ég byggi í þéttbýli þá væri rafmagnið ódýrara, stundum er rafmagnsreikningur hér því um 45.000 krónur þar sem við höfum ekki hitaveitu.“
Verðtryggð lán, óverðtryggð lán eða engin lán ?
„Við erum með bílalán og erum að greiða niður gamlar skuldir.“
Umhverfisvernd, skiptir hún þig máli ?
„Ekki mikið en ég reyni eftir fremsta megni að flokka rusl og hér í Strandabyggð er mikið flokkað af rusli, það eru sex sorpflokkar sem er mjög gott.“