Neytandi vikunnar er Björg Línberg, 54 ára öryrki. Björg vinnur 50 prósent starf hjá Íslandspósti og er ein í heimili. Hún á eina uppkomna dóttur.
Hve miklu eyðir þú í mat og aðrar rekstrarvörur heimilisins á mánuði og hvar verslar þú helst ?
„Ég eyði um það bil 120.000 krónum í mat og rekstrarvörur heimilisins á mánuði.“
Hvað með sparnað í matarinnkaupum og hverju vilt þú breyta sem neytandi ?
„Ég myndi vilja að hægt væri að kaupa minni pakkningar, eins og fyrir eina manneskju og þurfa þá ekki að borga hlutfallslega meira fyrir það sökum þess að það er dýrara að framleiða matvæli í smærri skömmtum “
Leggur þú fyrir, og hvaða leiðir notar þú ef svo er ?
„ Ég legg inn á bankareikning ef ég á einhverjar krónur eftir þegar ég hef greitt allt sem þarf að greiða í hverjum mánuði“
Telur þú álagningu verslana sanngjarna og gerir þú verðsamanburð á vörum og þjónustu ?
„Mér finnst álagning verslana allt of há. Nú þegar sjálfsafgreiðslukassarnir eru komnir í verslanir, ættu innkaup að vera ódýrari fyrir neytandann því þá er búið að taka laun starfsmanna út úr þessari breytu að mestu.“
Umhverfisvernd, skiptir hún þig máli ?
„Já umhverfisvernd skiptir mig miklu máli. Mér þykir alveg hræðilegt að sjá alla þá sóun sem er við lýði og þá miklu plastnotkun sem er alls staðar.“