Ómar telur Framsóknarflokkinn enn og aftur í lykilstöðu.
Ómar Ragnarsson, skemmtikraftur og fyrrum fréttamaður skrifar í dag á bloggsíðu
sinni, áhugaverðan pistil um Framsóknarflokkinn.
„Hallgrímur Helgason lýsti því skemmtilega eins og hans var von og vísa hér um árið hvernig hann hefði nýtt sér kosningaréttinn til hins ítrasta til þess að fá aðra flokka en Framsókn í ríkisstjórn,“ segir Ómar og bætir við „en kosningar eftir kosningar hefði það samt farið svo, að í raun kaus hann samt Framsókn til stjórnarsetu að afloknum öllum kosningunum.“
Ómar telur þá upp þær ríkisstjórnir sem Framsókn hefur verið hluti af. „Þessa stöðu sína byrjuðu Framsóknarmenn að rækta í kringum 1930, mynduðu vinstri stjórnir 1934, 1956, 1971, 1978 og 1988, en stjórnir með Sjálfstæðisflokknum 1939, 1947, 1950, 1953, 1974, 1983, 1987, 1995, 1999, 2003 og 2013.“
Þá lýkur Ómar pistlinum með þeim orðum að Framsóknarflokkurinn hafi í síðustu kosningum í raun ráðið hvernig stjórnin yrði mynduð. „Og stefnir auðvitað á svipaða útkomu nú.“