Skjálftavirkni á svæðinu í kringum Grindavík er mest í Hagafelli, rúma tvo kílómetra norðan við útjaðar bæjarins. Vísindamenn halda því ekki lengur fram að hætta sé á stórgosi í bænum sjálfum en telja ýmist að gos muni verða við gígaröðina Eldvörp eða við Hagafell. Talið er að gosið verði af svipaðri stærðargráðu og fyrri gos á svæðinu. Um verði að ræða túristagos og þannig fremur skaðlítið. Miklar framkvæmdir eru við að byggja varnargarða við orkuverið í Svartsengi þrátt fyrir að fullkomlega sé óljóst með hættuna á gosi þar. Yfirvöld hafa verið gagnrýnd fyrir fálmkennd viðbrögð og að alla á ofsahræðslu meðal íbúanna.
Bærinn er illa farinn eftir jarðskjálftana á föstudaginn. Þá hefur verið kvartað undan ágangi fjölmiðla sem sagðir eru voma yfir íbúunum. Ljósmyndari Ríkisútvarpsins var staðinn að verki við að reyna að brjótast inn í yfirgefið hús. Þá sést á eftirlitsmyndavélum að tveir menn rændu reiðhjólum frá yfirgefnu heimili. Vakið hefur ólgu meðal íbúað að Vegagerðin hefur strikað með rauðu yfir nafnið Grindavík á vegvísum.
Hátt í 300 jarðskjálftar hafa mælst á Reykjanesskaga frá miðnætti. Stærsti skjálftinn mældist 2,4 á Richter að stærð. Skjálftarnir fylgja kvikuganginum. Upptök flestra þeirra eru á 4-5 kílómetra dýpi.
Vika er á morgun frá því bærinn var rýmdur. Við rýminguna á aðfaranótt laugardags héldu sumir vísindamanna því fram að það væri spurning um klukkustundir eða jafnvel mínútur áður en gos yrði að veruleika. Enn er talið að gjósa mun á svæðinu en enginn getur sagt til um hvar það gerist á 10 kílómetra löngum kafla frá Eldvörpum um Grindavík og Svartsengi og að Hagafelli.
4000 íbúar búa við fullkomna óvissu og óreiðukenndar upplýsingar.