- Auglýsing -
Færeysk skattayfirvöl hafa kært dótturfélag Samherja, Tindhólm, til lögreglunnar. Félagið hefur endurgreitt rúmar 340 milljónir til yfirvalda þar vegna vangoldinna skatta. RÚV greindi frá.
Samherji var staðinn að því að skrá sjómenn sem voru á fiskiskipum í Namibíu, eins og þeir væru á farskipum í Færeyjum. Samkvæmt lögum í Færeyjum fá útgerðir skatt þeirra áhafna endurgreiddan. Ekki var heldur greiddur skattur af launum áhafnanna í Namibíu.
Eftir að upplýsingar um málið komu fram í heimildaþætti í færeyska sjónvarpinu endurgreiddi Tindhólmur því sem jafngildir rúmum 340 milljónum íslenskra króna til yfirvalda þar í landi. Skattayfirvöld í Færeyjum tóku málið nýlega til rannsóknar og hafa nú ákveðið að vísa því til lögreglu.