2019 | Birtingur útgáfufélag ehf | k.t. 620867-0129 | VSK.nr 11788 | Síðumúla 28 | Allur réttur áskilinn. Notkun á efni miðilsins er óheimil án samþykkis.

„Skóstærðir voru það fyrsta sem greip mig sem barn”

Kristinn Rúnar Kristinsson, nemi í fjölmiðlafræði við Háskólann á Akureyri, starfsmaður í Mathofinu og fyrirlesari, gaf út bókina Maníuraunir í fyrra. Hér ljóstrar hann upp fimm staðreyndum um sjálfan sig.

 

  1. „Ég notaði snuð til sex ára aldurs og hef verið frá þeim aldri með rammskakkt bit af þeim sökum, eða sentímeters djúpt lóðrétt yfirbit. Ég hef alla tíð forðast tannréttingar en næsta vor mun ég fara í kjálkaskurðaðgerð til þess að fá loksins rétt bit.“
  2. „Það er eiginlega lygilegt hversu margir hlutir eða margar manneskjur hafa verið í uppáhaldi hjá mér í gegnum tíðina sem koma frá Þýskalandi. Ber þar helst að nefna Dirk Nowitzki, Michael Schumacher, Rammstein, BMW og síðast en ekki síst hin raunverulegu þýsku stál, Wehmeier-feðgana og stórvini mína, Arne, Arne Karl og Tómas Helga.“
  3. „Ég prófaði að reykja í fyrsta sinn þegar ég var átta ára gamall. Það voru til vindlar og sígarettur heima hjá mér inni í skáp, ætlað besta vini pabba og ömmu minni heitinni, þegar þau kæmu í heimsókn. Ég varð bara að prófa þetta, kíkti út á svalir þegar ég var einn heima og naut reykinganna bara ágætlega!“
  4. „Ég er gríðarlega mikill treyju- og glasasafnari. Helst hef ég eytt peningum í gamlar fótboltatreyjur og telja þær í kringum 200 stykki. Glösin sem ég á eru einnig fjölmörg, til dæmis margs konar bjórglös og Mjólkurbikarglös. Ef ég verð einhvern tíma gjaldþrota þá verður það líklega vegna þess að ég gleymdi mér aðeins í kaupum á þessu tvennu.“
  5. „Þegar ég var barn þá voru skóstærðir fólks það fyrsta sem greip áhuga minn við það. Ég skoðaði vel stærðina á skónum og eftir smáumhugsun skaut ég á númerið og iðulega var það rétt, fólki til töluverðrar undrunar. Kristinn Rúnar Jónsson, nafni minn og frændi, var alveg viss á þeim tíma að ég yrði skósmiður þegar ég yrði eldri. Það er aldrei að vita nema að það detti inn í náinni framtíð.“

Kristinn Rúnar hitti átrúnaðargoðið sitt í vor, Dirk Nowitzki í Dallas

 

AUGLÝSING


Kristinn Rúnar gaf út bókina Maníuraunir í fyrra.

 

Kristinn Rúnar tekur þátt í Klikkaðri menningu sem verður haldin alla helgina, í tilefni 40 ára afmælis Geðhjálpar. Öll dagskráin er á www.klikkud.is eða Klikkuð menning á Facebook. Kristinn verður þremur öðrum Í Borgarbókasafninu Grófinn á laugardag kl. 14-17.

Ekki missa af þessum

Annað áhugavert efni

Nýjast á Mannlíf.is