Gunnar Smári Egilsson, fjölmiðlamaður og sósíalisti, segir það dæmigert að maður eins og Davíð Þorláksson, innmúraður Sjálfstæðismaður, sé settur yfir félagi sem sjá á um Borgarlínuna. Hann segir braskara sleikja út um eftir að fréttir voru sagðar af því í gær.
Davíð var ráðinn framkvæmdastjóri opinbera hlutafélagsins Betri samgangna, sem á svo að sjá um framkvæmd Borgarlínunnar. Sjálfstæðismenn hafa manna mest gagnrýnt þau áform. Í það minnsta hingað til.
„Dæmigert fyrir hið ógeðslega samfélag (tilvitnun í Styrmi). Löngun Samfylkingarfólks í Borgarlínu býr til 100 milljarða braskfélag sem innvígður og innmúraður Sjálfstæðismaður (aftur tilvitnun í Styrmi) er settur yfir. Davíð Þorláksson er ekki ókunnur braski, kom meðal annars að hörmungarsögu Lindarvatns, sem lífeyrissjóðir og Icelandair töpuðu miklu fé á en ýmsir braskverjar auðguðust af,“ segir Gunnar Smári.
Hann segir að öllum ætti að verða ljóst hvernig þetta endar. „Það þarf ekki spámann til að spá eins fyrir þessu félagi. Maður sér braskliðið, sem hefur náð öllum völdum yfir Sjálfstæðisflokknum, sleikja út um við þessa ráðningu. Fjárglæfrafélagið Gamma, sem steyptist á hausinn inn í Kviku, samdi meðal annars stefnuna um braskvæðingu allra innviða samfélagsins fyrir Sjálfstæðisflokkinn, sem nú er orðin opinber stefna stjórnvalda; tónlistin sem Dagur B. og Katrín Jakobsdóttir dansa nú eftir.“